د.ياسرالشريف سندباد مصر ديلي جراف عربية

 

سندباد

أنا عايش زي نجم في المَجره

تايه فى الكون لا أنا جوا ولا بره

أنجذب كل لحظه يمين مَره  شِمال مَره

أدور بين الكواكب غريب والحياة مُره

تايه في الفضا الواسع

لا أنا شايف ولا سامع

وأبلاتين الدماغ لادِع

بس راجل كلمتي حُره

وعايش ما بين كسوف وخسوف

وقلبي عُمره ما يعرف خوف

أسير الفَضل والمَعروف

وروحي عايشه بالفِطره

وباسبَح في السما الواسعه

وسط نجوم زاهيه ولامعه

ملاح في بحور العالم السبعه

معايا رجال لهم نفوس صابره

سندباد رَحال عايم علي ضَهر موج البحر

سفينتي حُب وغرام وشراعها مجدول من حِبال الصبر

سايرة في بحر الشوق ما رِسيت يوم علي بَر

 سَبَقِت زمان بزمان ريح رهوان كما المُهره

سرقني زماني و عَدي العُمر

 سيف القدر علي الرِقاب بيمٌر

سنين بنحارب الفساد والشَر

ساقيه ودايره وبقينا بين البشر عِبره

د.ياسرالشريف