أهم الانباء الليلة
ألمانيا
بصوا هو الرئيس الالماني النهاردة صحي من النوم الصبح ويادوب مراته حضرتله الحمام علشان يلحق صلاة الجمعة وقبل صلاة الجمعة كدا راح واخد قرار بحل البرلمان الالماني .... اه والله
وقالك بقا ندعوا لإنتخابات مبكرة علي نضافة
علشان شولتس والحزب بتاعه والحكومة بتاعة هتجيب المانيا لورا.... والمصانع بتقفل والشركات بتفلس والإقتصاد بيفلقس وليلة طين حضرتك …شوف ..الألمان ………………مش هيلاقوا حد بيفهم تاني زي ميركل ، ميركل هي اخر ست كانت بتفهم في اوروبا كلها والله
سوريا...
في سوريا .... الصورة بدأت توضح شوية
لما طلع النهاردة وزير خارجية روسيا سيرجي لافروف في مؤتمر صحفي وقال...
ان أحمد الشرع قائد الإدارة الجديدة في سوريا...... وصف العلاقات مع روسيا انها طويلة الأمد وإستراتيجية
هتقولولي مش فاهمين ...؟؟
هقولكم ...
علشان كل كلمة ليها معنى وميزان...!!!
مفيش كلمة بتتقال ومفيش حاجة بتحصل صدفة يا صديقي
لافروف قال بالحرف كدا ...
قائد الإدارة الجديدة بسوريا المدعوا احمد الشرع او الملقب بالجولاني قال ان العلاقات مع روسيا ممتدة وإستراتيجية...!!
ايه.... بتقول إيه يا حج لافروف؟؟؟
قائد إدارة جديد ؟؟
يعني مش ثوار احرااار ؟؟
يعني مش رئيس دولة...!!؟
قالك لا ...
احمد الشرع هو قائد الإدارة الجديد
علشان كدا بوتين يوم التلات طلع وقال ان روسيا حققت كل اهدافها في سوريا
ايوا يعني اللي هي إيه يا عم بوتين ؟؟
أهداف روسيا زي ما هي حضرتك... قواعدها موجودة ورجالتها موجودة ع الارض
كل الحكاية اننا غيرنا الإدارة من بشار اللي كان مدايق كل الناس للجولاني
علشان الكل يتراضى..... على حساب مين بقا..... طبعا على حساب ام الشعب السوري حضرتك
انا عارف انكم توهتم مني ....
هبسطهالكم
حرفيا في الكرة الارضية الان ...
إحنا دلوقتي في قانون الغابة
الضعيف..... ملهوش مكان في هذا الكوكب
الغبي..... ملهوش مكان في هذا الكوكب
يعني إيه الكلام دا....!!
يعني حضرتك حسب قانون الغابة اللي إحنا عايشينة في الكوكب دلوقتي سوريا بقت ضعيفة وفريسة سهلة ف كل اللي عايز حتة من الفريسة هياخدها عادي جدا .... و ابو ام الشعب السوري ملهوش اي اختيار اصلا
هو إنت فاكر ان الجولاني عنده أي إختيار ؟؟
قولي بس والنبي هينفذ أجندة مين ولا طلبات مين ؟؟
أمريكا ؟؟
ولا روسيا ؟؟
ولا تركيا ؟؟
ولا إسرائيل ؟؟
ولاالسعودية ؟
ولا قطر ؟
كل دول اللاعبين والممولين للي بيحصل في سوريا ، وكلهم ليهم سيديهات وملفات وخطط عايز يطبقها ع الارض وكل واحد من دول عايز نصيبة ف الدبيحة اللي وقعت فين بقا الشعب السوري ..... تعيش إنت يا حج
القصة والحدوتة تخلص على كدا .... أبدا !!!
محافظ دمشق الجديد النهاردة طلع وقال لوسائل الإعلام الامريكية.... اه والله قال كدا
بناشد الإدارة الأمريكية انها تساعدنا لتأسيس سلام دائم مع الإسرائيليين
طب على اساس إيه يا عم الحج.....!!
دول على حدود دمشق حضرتك ؟؟
قالك مش مهم الحدود.... المهم اننا عايزين نعيش مع بعض في سلام ووئام ونلاقي حضن يضمنا كلناااا ...كلنااا
طب تمام يا عم الحج...... إنتوا ثوار احرار براحتكم طب ومصر ؟؟
قالك لاء مصر دول كفار.... اه والله
طب وإسرائيل يا حج جولاني...!!!
قالك لاء دول أهل ذمة.... والرسول وصانا على أهل الذمة علشان كدا عايزين نعمل معاهم سلام مصر تسكت ع المهزلة دي ...ابدااا!!!
مصر راحت باعتة نشرة للإنتربول الدولي بتطالب فيها بالمطلوبين دوليا على قوائم الإرهاب الدولية اللي هما اصلا الإدارة الجديدة لسوريا هتقولولي طب النظام الدولي هيسلمهم فعلا...؟؟
هقولكم لاء طبعا علشان دول اللي بينفذوا طلبات الأسياد يابني بطل سذاجة بقا..... هي العراق قامت ليها قومة من سنة ٢٠٠٠ ؟؟
حد سمعلها حس ولا خبر ؟؟
طب هل في حد في العراق عارف بترول العراق بيروح فين وبييجي منين وفلوسه فين ؟؟
رغم إنه تاني اكبر منتج للنفط في العلم
طب هو في حد في العراق اصلا عارف حدود العراق فين ؟؟
اللي هو اصلا عايشين في دولة فيدرالية أيوا يعني مين بيحكم مين ..... محدش هناك عارف حاجة !!! ولا تعليم ولا جامعة ولا مستشفيات ولا جيش ولا بنية تحتية ولا صرف صحي ولا طرق ولا مية الشعب العراقي عايش اليوم بيومه وبس
اليمن....
النهاردة اليمن رجعت للخمسينيات حرفيا....
لا بقا في محطات كهربا
ولا محطات مية
ولا مواني
ولا مستشفيات
ولا حتى مطارات... حضرتك مطار صنعاء العاصمة إتدمر تماما
اللي هو زي مطار القاهرة الدولي كدا عندنا
إمبارح إسرائيل دشملت كل حاجة هناك حرفيا
كل ده علشان كل شوية يطلع صرصار من الحوثيين يمسك المكرفون ويقولك اطلقنا مسيرة على مطار بن غوريون
اللي هو احيه اصلا المسيرة موصلتش حضرتك
ولو وصلت يادوب بتهز ستاير الشبابيك في المطار الصراحة يعني العيال الحوثيين دول بيفكروني بصراصير البلاعة
الشعب اليمني .... اطيب شعب ممكن تقابله في حياتك انما الحوثيين دول تربية إيران .... اوسخ تربية
إيران....
ف إيران بقا....
النظام في إيران حس إنه بقا بلبوص خلاص
وكل رجالته ع الارض إنتهوا تماما والدور اللي جاي عليه حرفيا
حماس..... تعيش انت يا حج
حزب الله.... تعيش انت ياحج
الحوثيين..... تعيش انت يا حج
سوريا..... تعيش انت يا حج
طب الحل إيه ....؟؟
بزشكيان الإسبوع اللي جاي رايح روسيا لعقد شراكة إستراتيجية شاملة
وتسليم إيران لروسيا تسليم أهالي.... ع المفتاح حضرتك..... اه والله
تركيا....
تركيا بقا مستنتش لما الجولاني يقول ولا يعيد ولا حتى يفكر....!! تخيل يا مؤمن اول حاجة طالبت بيها تركيا من الإدارة الجديدة في سوريا هي إيه ؟؟
هتقولولي ....
وحدة وسيادة الاراضي السورية.... تؤتؤ
طب إعمار سوريا..... تؤتؤ
طب عودة اللاجئين وحرية الشعب السوري... تؤتؤ
الله...... حيرتنا معاك...؟؟؟
اومال طلبت ايه ؟؟
والله اول حاجة طلبتها تركيا من النظام في سوريا هو تقسيم الحدود البحرية بين سوريا وتركيا
ايوا..... غاز البحر المتوسط
عايز يسرق غاز سوريا
بص هو نفس الفيلم الهندي اللي حصل في ليبيا لما كان عايز يعمل تقسيم حدود بحرية مع ليبيا المصيبة ان مفيش اصلا حدود بين تركيا وليبيا
لا هو انا عايز أقسم الحدود البحرية مع ليبيا
لحد ما السيسي حطله الخط الاحمر خلص الكلام.
كوريا الجنوبية....
النهاردة بقا البرلمان الكوري الجنوبي صوت على عزل الرئيس...
اااه..... خد الشر وراح
بس خد بالك حضرتك
ان العملة الكورية النهاردة ال وون كوري هبط لأدنى مستوى ليه من ١٥ سنة
والدنيا في كوريا الجنوبية .... مش ولا بد
وفي تحيا مصر ....
بقا يعني ف أخبار العالم بتاعت يوم الإتنين اللي فات اطلع اقولكم إن في عهد عبدالفتاح السيسي بيتبني ٢٠٦٦ مصنع صيني بكل اجهزتهم بكل المكن بتاعهم ونقل كامل لتكنولوجيا التصنيع بتاعتهم فمصر علشان مصر بتتجهز تكون صين إفريقيا والشرق الاوسط
تقوم الجزيرة تاني يوم يا مؤمن ترد عليا بخبر وتقول فيه ان سنة ٢٠٢٤ خرج من مصر ٢٣٦٠ شركة مصرية وراحت دبي بسبب البيروقراطية...!!
هتطلعلي واحدة من تحت اللحاف مأفأفة من البرد والرطوبة ماسكة في ركابها وتقولي يعني إيه !!
يعني دخلنا ٢٠٦٦ شركة وإستثمارات صينية وخرج من عندنا ٢٣٦٠ مصرية
بقا دا إسمه كلام والنبي ..... هي الحكومة عايزة الناس تاكل وشنا يا ختي ؟؟؟
هقولك صلي ع النبي في قلبك كدا .... ودفي ركبك وخدي شفطة شاي كدا ودفي صدرك وهفهمك إزاي بيضحكوا عليكي في الأخبار...!!
الخبر الاول اللي انا قولته يوم الاتنين اللي فات واللي اعلنته الحكومة المصرية من خلال البيانات الرسمية لوزارة الإستثمار
ان مصر بيتبني فيها ٢٠٦٦ مصنع صيني..... خد بالك يا صديقي من كلمة مصنع ومنطقة صناعية وتصنيع وتوطين تكنولوجيا..... بكام بقي ؟؟ بإستثمارات تجاوزت ال ٨ مليار دولار حلو؟؟؟
لا مش حلو..... حضرتك
علشان الجزيرة معجبهاش الخبر يبقا كدا والمصريين يفرحوا.....؟؟
بقا دا اسمه كلام والنبي ؟؟
راحوا خابطين خبر تاني يوم ان في ٢٣٦٠ شركة مصرية خرجوا من السوق في مصر..... خد بالك انها نفس الارقام
ماشي يا جزيرة .... مش هكدبك ف الارقام بس الشركات دي شركات إيه ؟؟
مقالتش....!!!
طب بتنتج إيه ..؟؟
برضوا مقالتش ...!!
طب إستثماراتهم قد إيه ف السوق المصري ...!!!
برضوا مقالتش حضرتك!!!
طيب حضرتك بذكائك كدا .... معقول في ٢٣٦٠ شركة مصرية عندهم مصانع في مصر نقلوا مصانعهم دبي ؟؟
ايه يا عم دي دبي كلها شارعين وناصية عند أبو لبن اللي جنب بتاع العصير الاماراتي !!!
هتقولولي الله اومال الشركات دي إيه بقي ...!!!
هقولكم دي شركات خاصة حضرتك
يعني مثلا انا واتنين تلاتة اصاحبي عملنا شركة لاي حاجة في ساندوتش في مصر
استيراد وتصدير مثلا ....!!
وجينا نستورد حضرتك من برة كريم تفتيح الفخاد ....لقينا الحكومة قفلت الاستيراد تماما وطلعت قرار ان مفيش إستيراد ولا توفير عملة صعبة من البنوك غير لتوفير مواد الخام للمصانع في مصر تفتكر انك وكصاحب شركة إستيراد وتصدير هتسكت ...!!
طب يرضيك أسيب الفخاد مجلخة من غير كريم تفتيح !!!
كل الحكاية هروح اشتري حمام متر في متر في دبي وهقول انا شركتي بقا ليها مقر دولي في دبي وهعلن نقل مقر شركني لدبي وكدا بقت شركتي شركة دولية
وأقدر أستورد اللي انا عايزة...!!!
شوفت بقا حضرتك..... ٢٣٦٠ شركة مصرية اللي راحوا دبي اصلا مبيصنعوش حاجة
معظمهم شركات استيراد وتصدير ... حضرتك كموسيونجية بالبلدي كدا
انما ال ٢٠٦٦ مصنع اللي بيتبنوا في مصر دول لتوطين الصناعة في مصر حضرتك
القصة والحدوتة تخلص على كدا.... أبدا !!
كمان في تحيا مصر ....
يطلع رئيس الوزاراء ويقول مع نهاية ٢٠٢٤ مصر بتسدد ٧ مليار دولار من ديونها ويبقا مجمل الديون اللي مصر سددتها سنة ٢٠٢٤ ....
٣٨ مليار دولار
طبعا اللي بيحصل ده عظمة العظمة
احساسك انك بتسدد الديون ف دا ملهوش غير معنى واحد..... ان الدولة المصرية ماشية صح مهما كانت الظروف
يااخي قيسها على نفسك كدا ...!!
لو انت مديون وبتسدد في المعاد ....دا معناه إيه ؟؟
معناه انك ماشي صح
انما لو مديون لحد وكل شوية بتطلب منه تأجيل.... فدا معناه إنك بتمر بأزمة
ودا يطمنك كمصري ان الحمد لله مصر بخير وبتتقدم وبتسدد ديونها في معادها ومفيش ازمة عملة ولا إنهيار اقتصادي ولا تفليس من غير ما تسمع لخبير إقتصادي ولا تسلم نفسك لمحلل يوتيوب ...!!
الإقتصاد ببساطة.... في التقرير القادم إن شاء الله …….انتظرونى جيلكم ان شاء الله وبقوة.
تحياااااامصر السيسي حرة شااااامخة أبية عصية علي اعدائها ...
إحمدوا ربنا ……. وإذكروا الله كثيرا لعلكم تفلحون.
0 تعليقات