ذكريات زمان وليالى زمان
..................
الله على زمان وأيام زمان
واحشنى نفسي زمان
كانت أمى بتدعيلى بدعوة حلوة دايما وتقولها بصوت عالى
ربنا يحبب فيك خلقة من الناس
ماكنتش فاهم دعوتها
لما كبرت عرفت معناها حب العبد من حب الرب
هو ده الإيمان .
الله على زمان وأيام زمان
واحشنى نفسي زمان
كان زمان فيه أمثال حلوة أتربينا عليها وأتعلمنا منها الأصول
وخلناها عبرة لينا حتي هذا الزمان .
الله على زمان وأيام زمان
واحشنى نفسي زمان
كنا بنتلم على حدوته حلوة
يتحكى فيها أحلى الكلام
ونبدئها بكان يا مكان
مايحلى الكلام إلا بذكر النبى عليه الصلاة والسلام .
الله على زمان وأيام زمان
واحشنى نفسي زمان
الضيوف كانت مابتخلاش من البيوت يتعزموا على كباية شاى
يشكروا أيدى من عملها
أصلوليين
عندهم الطيبة والبساطة والأحساس .
الله على زمان وليالى زمان
واحشنى نفسي زمان
وتمتد إليك كام أيد تطبطب عليك
تفرح لفرحك وتحزن لحزنك وتشيل معاك همك كمان .
الله على زمان وأيام زمان
واحشنى نفسى زمان
كنا بنتلم على ماتش كوورة
ولا فيلم عربى على تلفزيون أبيض وأسود من غير ألوان دايما قارفنا بيلغوش على الصورة
نطلع فوق السطوح نلف ونعدل الأريال عشان نظبط الإرسال .
الله على زمان وأيام زمان
واحشنى نفسي زمان
نتلم على طبلية أبونا نأكل عليها أنا وأمى وأختى وأخويا من خير زمان
والأكل كان فيه بركة وليه طعم حلو يكبر الصبيان ويبقوا فتيان .
الله على زمان وأيام زمان واحشنى نفسى زمان
وأيام البرد نتدفى على بابور الجاز ونسلك الفونيا عشان الدخنه والهباب .
ويدخل علينا الليل نولع اللمبة الجاز نذاكر عليها
ونعملها وناسة سهارى لما
ننام .
الله على زمان وليالى زمان
واحشنى نفسى زمان
كان مافيش تليفونات محمولة
ولا نت لاهي كل الناس
ولا كان فيه حب النفس
ولا خصام للأهل والأخوات والأحباب .
الله على زمان وأيام زمان
واحشنى نفسى زمان
وأم كلثوم قالت وعايزنا نرجع زى زمان قول للزمان ارجع يازمان ....... ....... .......
واحشنى نفسى زمان
والكلام لاينتهى على زكريات زمان وأيام زمان ... ... ...
بقلم / محمد جمعة .
مصر
0 تعليقات